*సాలూరు జనసేనలో టికెట్ చిచ్చు.. తిరుగుబాటు బావుటా*!
*మున్సిపల్ చైర్మన్ అభ్యర్థి ఎంపికపై భగ్గుమన్న అసంతృప్తి.. నిర్ణయం మార్చకుంటే మూకుమ్మడి రాజీనామాలకు సిద్ధం*!
అధిష్ఠానం నిర్ణయంపై నాయకులు, కార్యకర్తల తీవ్ర నిరసన.. జనసేనకు కేటాయించిన సీటుపై పార్టీలోనే రాజకీయ దుమారం!
సాలూరు: స్థానిక సంస్థల ఎన్నికల వేళ సాలూరు జనసేనలో రాజకీయ వేడి ఒక్కసారిగా రాజుకుంది. మున్సిపల్ చైర్మన్ సీటు జనసేనకు కేటాయించడంపై హర్షం వ్యక్తం చేసిన పార్టీ నాయకులు, కార్యకర్తలు.. అభ్యర్థి ఎంపికపై మాత్రం తీవ్ర అసంతృప్తి వ్యక్తం చేస్తున్నారు. రెండు, మూడు రోజులుగా చర్చలు జరిపి, పార్టీ నాయకులు, కార్యకర్తలు సమష్టిగా నిర్ణయించిన పేర్లను అధిష్ఠానానికి తెలియజేసినప్పటికీ.. అనూహ్యంగా మరో వ్యక్తిని అభ్యర్థిగా పరిగణనలోకి తీసుకున్నారన్న ప్రచారం పార్టీలో ప్రకంపనలు సృష్టిస్తోంది. తమ అభిప్రాయాలను పక్కనపెట్టి తీసుకున్న నిర్ణయాన్ని వెంటనే మార్చుకోవాలని నాయకులు డిమాండ్ చేస్తున్నారు. లేదంటే తమ నిరసనను మరింత బహిరంగంగా వ్యక్తం చేస్తామని హెచ్చరిస్తున్నారు.
సమష్టి నిర్ణయాన్ని పక్కనపెట్టారా?
జజ్జపు సూరిబాబు మాట్లాడుతూ.. పార్టీ నాయకులు, కార్యకర్తలందరూ కలిసి జరజాపు దీప్తి, కిలపర్తి స్రవంతి పేర్లను అభ్యర్థులుగా ప్రతిపాదించి అధిష్ఠానానికి తెలియజేశామని పేర్కొన్నారు. నియోజకవర్గంలో ఇప్పటివరకు నాయకులు, కార్యకర్తలు సమష్టిగా పనిచేస్తూ వచ్చారని, ఇదే విషయాన్ని నాగబాబు దృష్టికి కూడా తీసుకెళ్లామని తెలిపారు.
సుమారు 20 మంది వరకు కౌన్సిలర్ అభ్యర్థులను సిద్ధం చేసుకోవాలని, ఆశావహులంతా నామినేషన్లు వేసుకోవచ్చని సూచించిన నేపథ్యంలో తాము ఎన్నికలకు సన్నద్ధమవుతున్నామని వివరించారు. అయితే, అనూహ్యంగా వైఎస్సార్‌సీపీకి చెందిన వ్యక్తి పేరును సాలూరు జనసేన మున్సిపల్ అభ్యర్థిగా పరిగణనలోకి తీసుకున్నారన్న వార్త తమను ఆశ్చర్యానికి గురిచేసిందని అన్నారు. ఈ నిర్ణయాన్ని తీవ్రంగా వ్యతిరేకిస్తున్నామని, అభ్యర్థి ఎంపికపై పునరాలోచన చేయకుంటే మూకుమ్మడి రాజీనామాలకు సైతం సిద్ధంగా ఉన్నామని స్పష్టం చేశారు.
సమన్వయ వ్యవస్థ ఎక్కడ? శివ ప్రశ్న
జనసేన మండల అధ్యక్షుడు శివ మాట్లాడుతూ.. టీడీపీ, వైఎస్సార్‌సీపీ నాయకులు ఇప్పటికే వార్డుల్లో తిరుగుతూ ఎన్నికల ప్రచారానికి సిద్ధమవుతున్నారని, మరోవైపు జనసేనలో అభ్యర్థి ఎంపికపై గందరగోళం నెలకొనడం ఆందోళన కలిగిస్తోందని అన్నారు.
గత నాలుగు రోజుల్లో మూడు రోజులు పార్వతీపురం వెళ్లాల్సి వచ్చిందని, ప్రతి అంశానికీ అక్కడికి వెళ్లి చర్చించాల్సిన పరిస్థితి ఏర్పడుతోందని ఆవేదన వ్యక్తం చేశారు. పార్వతీపురం స్థాయిలోని కోఆర్డినేషన్ వ్యవస్థలో కూడా తగిన సంప్రదింపులు లేకుండానే నిర్ణయాలు జరుగుతున్నాయన్న అసంతృప్తిని వ్యక్తం చేశారు.
జనసేనకు కేటాయించిన చైర్మన్ సీటుపై తమ అభిప్రాయాలకు విలువ లేనప్పుడు ఆ సీటు తమకు అవసరం లేదని శివ వ్యాఖ్యానించారు. కూటమి ధర్మంలో భాగంగా ఆ సీటును టీడీపీకి కేటాయించినా సంతోషంగా పనిచేస్తామని పేర్కొన్నారు. అయితే, కూటమికి సంబంధం లేని వ్యక్తిని అభ్యర్థిగా ఎంపిక చేస్తే టీడీపీలోనూ వ్యతిరేకత వ్యక్తమయ్యే అవకాశముందని అభిప్రాయపడ్డారు.
ఓటు బ్యాంకుపై వ్యాఖ్యలు.. రాజకీయ వేడి!
నిన్న జరిగిన నాగబాబు సమావేశంలోనూ అభ్యర్థుల ఎంపికపై తమ అభిప్రాయాలను తెలియజేశామని అసంతృప్తి వ్యక్తం చేస్తున్న నాయకులు చెబుతున్నారు. ఇదే సమయంలో మంత్రి సంధ్యారాణి జనసేనకు రెండు నుంచి ఐదు శాతం వరకు ఓటు బ్యాంకు ఉందని వ్యాఖ్యానించినట్లు ప్రస్తావిస్తూ.. వాస్తవంగా తమ పార్టీకి 20 నుంచి 30 శాతానికి మించిన ఓటు బ్యాంకు ఉందని వారు వాదిస్తున్నారు. టికెట్ కేటాయింపు వ్యవహారమే పార్టీలోని బలాబలాలపై చర్చకు దారితీసిందని పేర్కొంటున్నారు.
అధిష్ఠానం ఏం చేస్తుంది?
సాలూరు మున్సిపల్ చైర్మన్ సీటు జనసేనకు దక్కడం ఒకవైపు సంతోషాన్ని కలిగిస్తుండగా, అభ్యర్థి ఎంపిక వ్యవహారం మరోవైపు పార్టీలో అంతర్గత విభేదాలను బయటపెడుతోంది. కార్యకర్తలు, నాయకుల సమష్టి అభిప్రాయానికి ప్రాధాన్యం ఇవ్వాలని అసంతృప్త వర్గం పట్టుబడుతోంది. తమ ప్రతిపాదనలను పరిగణనలోకి తీసుకుని నిర్ణయాన్ని మార్చుకోవాలని కోరుతోంది.
అధిష్ఠానం ఈ అసంతృప్తిని ఎలా పరిష్కరిస్తుంది? నాయకులు హెచ్చరిస్తున్న మూకుమ్మడి రాజీనామాల దిశగా పరిస్థితి వెళ్తుందా? లేక చర్చల ద్వారా వివాదానికి తెరపడుతుందా? అన్నది ఇప్పుడు సాలూరు రాజకీయాల్లో ఉత్కంఠ రేపుతోంది..
