వాయిస్ ట్రస్ట్ ఆధ్వర్యంలో భగత్సింగ్ జయంతి.. యువతకు దేశభక్తి సందేశం అమరవీరుల త్యాగాలను తరతరాలకు పరిచయం చేయాలని పిలుపు జాతీయ నాయకుల చరిత్రను యువతకు చేరువ చేయడమే వాయిస్ ట్రస్ట్ లక్ష్యం.. ప్రతి పార్కులో జాతీయ నాయకులు, స్వాతంత్ర్య వీరుల విగ్రహాలు ఏర్పాటు చేయాలని జనసేన నాయకుడు శివకృష్ణ సూచన పార్వతీపురం/సాలూరు ప్రతినిధి, సెప్టెంబర్ 28: దేశం కోసం ప్రాణాలను సైతం లెక్కచేయకుండా పోరాడిన భగత్సింగ్ జీవితం నేటి యువతకు స్ఫూర్తిదాయకమని వాయిస్ ట్రస్ట్ ప్రతినిధులు పేర్కొన్నారు. భగత్సింగ్ జయంతిని పురస్కరించుకుని సాలూరు పట్టణంలోని గాంధీనగర్ పార్క్లో వాయిస్ ట్రస్ట్ ఆధ్వర్యంలో జయంతి వేడుకలను నిర్వహించారు. ఈ సందర్భంగా భగత్సింగ్, రాజ్గురు, సుఖదేవ్ విగ్రహాలకు పూలమాలలు వేసి ఘనంగా నివాళులర్పించారు. స్వాతంత్ర్యం కోసం యువ వయసులోనే ప్రాణత్యాగం చేసిన ముగ్గురు అమరవీరుల పోరాటాన్ని స్మరించుకున్నారు. వారి త్యాగం, ధైర్యం, దేశం పట్ల నిబద్ధతను నేటి తరానికి తెలియజేయాల్సిన అవసరాన్ని వక్తలు వివరించారు. “జాతీయ నాయకుల చరిత్రను యువతకు చేరువ చేయడమే వాయిస్ ట్రస్ట్ లక్ష్యం” – ట్రస్ట్ అధ్యక్షుడు బెవర నాగార్జున వాయిస్ ట్రస్ట్ అధ్యక్షుడు బెవర నాగార్జున మాట్లాడుతూ.. స్వాతంత్ర్య సమరయోధుల జీవితాలను కేవలం జయంతులు, వర్ధంతుల సందర్భంగా గుర్తు చేసుకోవడం సరిపోదన్నారు. వారి త్యాగాల వెనుక ఉన్న ఆశయాలు, దేశం పట్ల ఉన్న నిబద్ధత, ప్రజల కోసం వారు చేసిన పోరాటాన్ని నేటి యువతకు తెలియజేయాల్సిన అవసరం ఉందన్నారు. జాతీయ నాయకుల చరిత్రను యువతకు చేరువ చేయడమే వాయిస్ ట్రస్ట్ లక్ష్యాల్లో ఒకటని తెలిపారు. అమరవీరుల జీవితాల నుంచి యువత విలువలు, దేశభక్తి, సామాజిక బాధ్యతను నేర్చుకోవాలని పేర్కొన్నారు. “ప్రతి పార్కులో జాతీయ నాయకులు, స్వాతంత్ర్య వీరుల విగ్రహాలు ఏర్పాటు చేయాలి” – జనసేన నాయకుడు శివకృష్ణ జనసేన నాయకుడు శివకృష్ణ మాట్లాడుతూ.. స్వాతంత్ర్య సమరయోధుల చరిత్ర పుస్తకాల్లో మాత్రమే కాకుండా ప్రజలకు కనిపించేలా ఉండాలని అన్నారు. పార్కులు, బహిరంగ ప్రదేశాల్లో జాతీయ నాయకులు, స్వాతంత్ర్య వీరుల విగ్రహాలను ఏర్పాటు చేయడం ద్వారా యువతకు వారి జీవితాలు, పోరాటాల గురించి తెలుసుకునే అవకాశం కలుగుతుందన్నారు. చరిత్రను ప్రజా జీవితంలో భాగం చేయాల్సిన అవసరం ఉందని పేర్కొన్నారు. “భగత్సింగ్ 23 ఏళ్లకే దేశ భవిష్యత్తు కోసం జీవితాన్ని త్యాగం చేశారు” వాయిస్ ట్రస్ట్ ప్రతినిధి శ్రావణ్ కుమార్ మాట్లాడుతూ.. భగత్సింగ్ కేవలం 23 ఏళ్ల వయసులోనే దేశ భవిష్యత్తు కోసం తన జీవితాన్ని త్యాగం చేశారని గుర్తుచేశారు. అదే వయసులో చాలామంది తమ వ్యక్తిగత భవిష్యత్తు గురించి ఆలోచిస్తుంటే, భగత్సింగ్ మాత్రం కోట్లాది భారతీయుల భవిష్యత్తును తన ముందుంచుకున్నారని అన్నారు. దేశం కోసం తన వంతు ఏమి చేశాననే ప్రశ్న ప్రతి యువకుడిలోనూ కలగాలని పేర్కొన్నారు. స్వాతంత్ర్యం ఎందరో వీరుల త్యాగాల ఫలితంగా లభించిందని, ఆ త్యాగాల విలువను అర్థం చేసుకుని దేశం పట్ల బాధ్యతతో వ్యవహరించాల్సిన అవసరం ఉందన్నారు. ఆధునిక ఆలోచనలతో పాటు విలువలు, సామాజిక బాధ్యత, జాతీయ భావాలు కూడా యువతలో బలపడాలని అన్నారు. విద్య, ఉద్యోగం, వ్యక్తిగత లక్ష్యాల సాధనతో పాటు సమాజానికి ఉపయోగపడే ఆలోచనను పెంపొందించుకోవాలని సూచించారు. భగత్సింగ్ జయంతి సందర్భంగా విగ్రహాలకు నివాళులర్పించడంతో పాటు, ఆయన జీవితం అందించే సందేశాన్ని ఆచరణలోకి తీసుకురావడమే నిజమైన నివాళి అని వక్తలు పేర్కొన్నారు. దేశభక్తి ఒకరోజు కార్యక్రమానికే పరిమితం కాకుండా ప్రతిరోజూ మన ఆలోచనలు, మాటలు, చేతల్లో కనిపించాలని పిలుపునిచ్చారు. ఈ కార్యక్రమంలో అల్లం శ్యామల, పసుమర్తి నరేష్, సంగిరెడ్డి శివాజీ, చింత రామకృష్ణ, మీసాల నవీన్, పట్నాన మురళి, కూనిశెట్టి గుప్తేష్, బాలి హేమభూషణ్, నాయుడు సింహాచలం, పైల భవాని శంకర్, చంద్రశేఖర్, సాగర్ తదితరులు పాల్గొన్నారు. Spread the love టపా నావిగేషన్ వినాయక మండపాలపై ఎందుకీ హడావుడి సాలూరులో ‘అభివృద్ధి’కి మూడు అడుగులు.. విద్యకు భవనం, పేదలకు అన్నం, పార్టీకి కొత్త వేదిక
