నవంబర్ 03న పార్వతీపురం,సాలూరు పాలకొండలో జరిగే మునిసిపల్ ఎన్నికల ఓట్ల లెక్కింపు ప్రక్రియ ప్రశాంతంగా, పారదర్శకంగా నిర్వహించేందుకు కౌంటింగ్ కేంద్రాల వద్ద పటిష్టమైన భద్రతా ఏర్పాట్లు చేపట్టాలని *జిల్లా ఎస్పీ శ్రీ ఎస్.వి. మాధవ్ రెడ్డి, ఐపీఎస్* పోలీస్ అధికారులకు దిశానిర్దేశం చేశారు. కౌంటింగ్ కేంద్రాల వద్ద ఎలాంటి అవాంఛనీయ సంఘటనలు జరగకుండా ముందస్తు జాగ్రత్తలు తీసుకోవాలని, విధుల్లో ఉన్న సిబ్బంది అప్రమత్తంగా ఉండాలని సూచించారు. కౌంటింగ్ కేంద్రాల పరిసరాల్లో నిరంతర నిఘా ఏర్పాటు చేయడంతో పాటు, సీసీటీవీ కెమెరాల ద్వారా పర్యవేక్షణ చేపట్టాలని ఆదేశించారు.
1. ప్రతి సంబంధిత అధికారి రిటర్నింగ్ ఆఫీసర్ (RO) మరియు ఇతర సంబంధిత అధికారులతో కలిసి తమ పరిధిలోని ప్రతి కౌంటింగ్ కేంద్రాన్ని స్వయంగా సందర్శించాలి. కౌంటింగ్ జరిగే కేంద్రాలను సంబంధిత అధికారులు కూడా తప్పనిసరిగా తనిఖీ చేయాలి. సంయుక్తంగా భద్రతా ఏర్పాట్లను సమీక్షించి, గుర్తించిన లోపాలను వెంటనే సరిచేయాలి.
2. సున్నితమైన ప్రాంతాల్లో అవసరమైన చోట్ల అడుకట్టలు, కంచెలు ఏర్పాటు చేయాలి. కౌంటింగ్ కేంద్రం బయటి పరిసరాల్లో తగినంత లైటింగ్ ఉండేలా చూడాలి. అధికారిక ప్రవేశ, నిష్క్రమణ మార్గాలతో పాటు అత్యవసర మార్గాలకు ఎలాంటి ఆటంకాలు లేకుండా చూడాలి.
3. డ్రోన్లను విస్తృతంగా వినియోగించి కౌంటింగ్ కేంద్రాల పరిసర ప్రాంతాలు, అప్రోచ్ రోడ్లు, జనసమూహాలు ఏర్పడే ప్రాంతాలు, సమస్యాత్మక మరియు సున్నితమైన ప్రదేశాలను నిరంతరం పర్యవేక్షించాలి. ఏదైనా అవాంఛనీయ పరిస్థితి గుర్తించిన వెంటనే సంబంధిత సిబ్బంది ద్వారా క్షేత్రస్థాయిలో తక్షణ చర్యలు తీసుకోవాలి
4. కౌంటింగ్ కేంద్రాల లోపల కట్టుదిట్టమైన ప్రవేశ నియంత్రణ (Access Control) అమలు చేయాలి. బహుళ అంచెల తనిఖీ వ్యవస్థను ఏర్పాటు చేయాలి. ఎన్నికల అధికారులచే అనుమతించబడిన వ్యక్తులను మాత్రమే పూర్తి స్థాయి గుర్తింపు ధృవీకరణ మరియు ఫ్రిస్కింగ్ అనంతరం లోపలికి అనుమతించాలి.
5. కౌంటింగ్ ఏజెంట్లు ఇష్టానుసారంగా బయటకు వెళ్లి తిరిగి లోపలికి వచ్చే పరిస్థితిని అనుమతించకూడదు. ఎన్నికల సంఘం నిర్దేశించిన ప్రవేశం, తిరిగి ప్రవేశం (Re-entry) నిబంధనలను ఖచ్చితంగా అమలు చేయాలి.
6. కౌంటింగ్ ఏజెంట్లు మరియు కౌంటింగ్ టేబుళ్ల మధ్య తగిన ఎత్తు, పటిష్టత కలిగిన మెష్ బారికేడింగ్ ఏర్పాటు చేసి, అవి సురక్షితంగా బిగించబడి ఉన్నాయో లేదో తనిఖీ చేయాలి. బ్యాలెట్ పేపర్లు మరియు ఇతర కౌంటింగ్ సామగ్రికి ఎలాంటి ముప్పు వాటిల్లకుండా తగిన భద్రతా ఏర్పాట్లు చేయాలి.
7. అనుమతి లేని ద్రవ పదార్థాలు, అగ్గిపెట్టెలు, లైటర్లు, సిరా, మండే పదార్థాలు లేదా అల్లర్లు, విధ్వంసక చర్యలకు ఉపయోగపడే ఇతర వస్తువులను కౌంటింగ్ కేంద్రాల్లోకి అనుమతించకూడదు. తాగునీటిని అధికారికంగా నిర్దేశించిన మార్గాల ద్వారా మాత్రమే అందించేలా చూడాలి.
8. బందోబస్తులో ఉన్న ప్రతి పోలీసు సిబ్బందికి వారి విధులు, బాధ్యతలు మరియు అప్రమత్తతపై స్పష్టమైన బ్రీఫింగ్ ఇవ్వాలి. అవసరమైన సంఖ్యలో రిజర్వ్ బలగాలు, క్విక్ రియాక్షన్ టీమ్స్ (QRTs) సిద్ధంగా ఉంచాలి. కౌంటింగ్ ప్రక్రియ పూర్తయ్యే వరకు ROతో నిరంతర సమన్వయం కొనసాగించాలి.
కౌంటింగ్ ప్రక్రియ అత్యంత సున్నితమైనది మరియు కీలకమైనది. ఏ చిన్న విషయాన్ని కూడా నిర్లక్ష్యం చేయకూడదు. ఎలాంటి అంచనాలకు లేదా ఊహలకు తావివ్వకుండా ప్రతి కౌంటింగ్ కేంద్రాన్ని భౌతికంగా తనిఖీ చేసి, అన్ని భద్రతా ఏర్పాట్లు పూర్తిస్థాయిలో ఉన్నాయని నిర్ధారించుకోవాలని జిల్లా ఎస్పీ గారు అధికారులను సూచించారు.
