శంబర పోలమాంబ సన్నిధిలో గాయత్రీ దేవి అలంకారం.. పసుపు కొమ్ములతో అమ్మవారికి విశేష శోభ! శరన్నవరాత్రి వేడుకల్లో ప్రత్యేక పూజలు.. గోముఖి నదీ తీరంలో భక్తుల ఆధ్యాత్మిక సందడి శంబర: శరన్నవరాత్రి ఉత్సవాల సందర్భంగా శంబర పోలమాంబ అమ్మవారి ఆలయం భక్తి పారవశ్యంతో అలరారింది. పార్వతీపురం మన్యం జిల్లా మక్కువ మండలం శంబర గ్రామంలోని పవిత్ర గోముఖి నదీ తీరాన కొలువుదీరిన ఉత్తరాంధ్ర ఆరాధ్యదైవం శ్రీ పోలమాంబ అమ్మవారు సోమవారం (అక్టోబర్ 12) శ్రీ గాయత్రీ దేవి అవతారంలో భక్తులకు దర్శనమిచ్చారు. పసుపు కొమ్ములతో అమ్మవారిని ప్రత్యేకంగా అలంకరించడంతో ఆలయ ప్రాంగణం ఆధ్యాత్మిక శోభను సంతరించుకుంది. ఉదయం నుంచే ఆలయంలో ప్రత్యేక పూజా కార్యక్రమాలు నిర్వహించారు. గణపతి హోమంతో పాటు గరికతో విశేష హోమాలు నిర్వహించి అమ్మవారికి భక్తిశ్రద్ధలతో పూజలు సమర్పించారు. గాయత్రీ దేవి అలంకారంలో దర్శనమిచ్చిన అమ్మవారిని దర్శించుకునేందుకు భక్తులు పెద్ద సంఖ్యలో తరలివచ్చారు. పూజల అనంతరం భక్తులకు అమ్మవారి ప్రసాదాన్ని పంపిణీ చేశారు. ఆలయ కార్యనిర్వహణ అధికారి వి.వి. సూర్యనారాయణ పర్యవేక్షణలో కార్యక్రమాలు సజావుగా సాగాయి. ఆలయ ధర్మకర్తల మండలి చైర్మన్ నైదాన చినతిరుపతి, ధర్మకర్తల మండలి సభ్యురాలు గొట్టాపు భవాని, ఆలయ ఆశాదీలు చొక్కాపు ఈశ్వరరావు, గ్రామ పెద్దలు, ఇతర సభ్యులు పూజా కార్యక్రమాల్లో పాల్గొన్నారు. శరన్నవరాత్రి ఉత్సవాల నేపథ్యంలో అమ్మవారి దర్శనంతో భక్తులు ఆధ్యాత్మిక ఆనందాన్ని పొందారు. Spread the love టపా నావిగేషన్ పవనిజం స్ఫూర్తితో ప్రజాసేవకు జనసేన అడుగులు.. సాలూరులో మెగా వైద్య శిబిరం! సాలూరు అభివృద్ధికి బహుముఖ అడుగులు.. పట్టణం నుంచి గిరిజన పల్లెల వరకు ప్రగతి బాట!
