సాలూరులో ‘అభివృద్ధి’కి మూడు అడుగులు.. విద్యకు భవనం, పేదలకు అన్నం, పార్టీకి కొత్త వేదిక

సాలూరులో ‘అభివృద్ధి’కి మూడు అడుగులు.. విద్యకు భవనం, పేదలకు అన్నం, పార్టీకి కొత్త వేదిక

మంత్రి సంధ్యారాణి చేతుల మీదుగా వరుస ప్రారంభాలు.. రూ.53 లక్షలతో మండల విద్యాశాఖ అధికారి కార్యాలయం, అన్నా క్యాంటీన్ ప్రారంభం.. నూతన తెలుగుదేశం పార్టీ కార్యాలయానికి శ్రీకారం

సాలూరు: మంత్రి గుమ్మిడి సంధ్యారాణి సాలూరు పర్యటనలో భాగంగా ఒకేరోజు మూడు కార్యక్రమాలు జరిగాయి. ముందుగా రూ.53 లక్షలతో నిర్మించిన మండల విద్యాశాఖ అధికారి కార్యాలయాన్ని ప్రారంభించగా, అనంతరం రామాకాలనీలో నూతన తెలుగుదేశం పార్టీ కార్యాలయాన్ని ప్రారంభించారు. చివరగా తహసీల్దార్ కార్యాలయ ప్రాంగణంలో అన్నా క్యాంటీన్‌ను ప్రారంభించారు.

25 ఏళ్ల నిరీక్షణకు తెర.. విద్యాశాఖకు కొత్త కార్యాలయం

రామాకాలనీలో రూ.53 లక్షల వ్యయంతో నిర్మించిన మండల విద్యాశాఖ అధికారి కార్యాలయాన్ని మంత్రి సంధ్యారాణి ప్రారంభించారు. దాదాపు 25 ఏళ్లుగా ప్రత్యేక కార్యాలయం కోసం ఎదురుచూస్తున్న నేపథ్యంలో నూతన భవనం అందుబాటులోకి వచ్చింది. దీంతో విద్యాశాఖకు సంబంధించిన పరిపాలనా వ్యవహారాలను మరింత సౌకర్యవంతంగా నిర్వహించేందుకు అవకాశం ఏర్పడింది.

ఈ సందర్భంగా మంత్రి మాట్లాడుతూ విద్యారంగ అభివృద్ధికి మౌలిక వసతులు ఎంతో అవసరమన్నారు. ప్రతి పాఠశాలలో విద్యార్థులకు మెరుగైన వాతావరణం, అవసరమైన సౌకర్యాలు అందేలా చర్యలు తీసుకోవాలని సూచించారు. విద్యార్థుల భవిష్యత్తును తీర్చిదిద్దడంలో విద్యాశాఖ అధికారులు, ఉపాధ్యాయులు బాధ్యతతో పనిచేయాలని పేర్కొన్నారు. కార్యాలయ ప్రాంగణంలో మొక్కలు నాటారు.

రామాకాలనీలో నూతన పార్టీ కార్యాలయం

అనంతరం రామాకాలనీలోని 26వ వార్డులో నూతన తెలుగుదేశం పార్టీ కార్యాలయాన్ని మంత్రి ప్రారంభించారు. ఈ సందర్భంగా స్థానిక నాయకులు, కార్యకర్తలు, మహిళలు మంత్రికి ఘన స్వాగతం పలికారు. మేళతాళాలు, పూలమాలలు, పుష్పవర్షంతో కార్యక్రమం నిర్వహించారు.

ఈ కార్యక్రమంలో వైసీపీకి చెందిన సుమారు 50 మంది తెలుగుదేశం పార్టీలో చేరారు. మేకల శంకరరావు, మేకల గణేష్, మేకల శ్రీను, గొర్లె సతీష్, మజ్జి శ్రీను తదితరులకు మంత్రి పార్టీ కండువాలు కప్పి ఆహ్వానించారు.

సామాన్యులకు అందుబాటులో అన్నా క్యాంటీన్

అనంతరం సాలూరు తహసీల్దార్ కార్యాలయ ప్రాంగణంలో అన్నా క్యాంటీన్‌ను మంత్రి ప్రారంభించారు. పట్టణానికి వివిధ పనుల నిమిత్తం వచ్చే సామాన్యులు, రోజువారీ కూలీలు, ఆటో కార్మికులు, చిరు వ్యాపారులకు తక్కువ ధరకే భోజనం అందించాలనే ఉద్దేశంతో దీనిని ఏర్పాటు చేశారు.

ఐదు రూపాయలకే భోజనం అందించే ఈ కేంద్రంలో నాణ్యత, పరిశుభ్రత విషయంలో ప్రత్యేక శ్రద్ధ వహించాలని మంత్రి అధికారులకు సూచించారు. ఆకలితో ఉన్నవారికి ఆహారం అందించడం మానవతా బాధ్యతగా పేర్కొన్నారు. క్యాంటీన్ నిర్వహణలో ప్రజలకు ఎలాంటి ఇబ్బందులు లేకుండా చూడాలని ఆదేశించారు.

ఈ మూడు కార్యక్రమాల్లో అధికారులు, ఉపాధ్యాయులు, స్థానిక ప్రజలు, మహిళలు, తెలుగుదేశం పార్టీ నాయకులు, కార్యకర్తలు పాల్గొన్నారు.