గుర్ల: హిందీ భాషపై అవగాహనను పెంపొందించడంతో పాటు విద్యార్థుల్లోని సృజనాత్మకతకు పదును పెట్టేలా గుర్ల మండలం వల్లాపురం హైస్కూల్లో జాతీయ హిందీ దివస్ వేడుకలు నిర్వహించారు. హిందీ భాషా పక్షోత్సవాల్లో భాగంగా నిర్వహించిన కార్యక్రమాల్లో విద్యార్థులు ఉత్సాహంగా పాల్గొని భాషపై తమకున్న ఆసక్తిని, వివిధ రంగాల్లోని ప్రతిభను ప్రదర్శించారు. హిందీ ఉపాధ్యాయులు క్రాలేటి శారదా పద్మావతి, దివ్య శ్రావణిల ఆధ్వర్యంలో జరిగిన కార్యక్రమానికి హెచ్ఎం వడ్డాది అప్పారావు అధ్యక్షత వహించారు. ఈ సందర్భంగా హిందీ భాష ప్రాముఖ్యత, భారతీయ భాషా వైవిధ్యంలో దాని ప్రత్యేకతను విద్యార్థులకు వివరించారు. భాషను పాఠ్యాంశానికి పరిమితం చేయకుండా సాహిత్యం, సంస్కృతి, భావవ్యక్తీకరణకు వారధిగా అభ్యసించాలని సూచించారు. విద్యార్థులు ప్రదర్శించిన హిందీ పాటలు, టీఎల్ఎం ప్రదర్శనలు ప్రత్యేక ఆకర్షణగా నిలిచాయి. తొమ్మిదో తరగతి విద్యార్థిని ధనుశ్రీ మీరాబాయి పాత్రలో చేసిన ఏకపాత్రాభినయం కార్యక్రమానికి ప్రత్యేక శోభను తీసుకొచ్చింది. సంభాషణలు, హావభావాలతో పాత్రను ఆవిష్కరించిన ధనుశ్రీని ఉపాధ్యాయులు ప్రత్యేకంగా అభినందించారు. హిందీ భాషా పక్షోత్సవాల్లో భాగంగా విద్యార్థులకు వ్యాసరచన, వక్తృత్వం, చిత్రలేఖనం పోటీలు నిర్వహించారు. వ్యాసరచనలో పదో తరగతి విద్యార్థులు హేమలత, నవీన్ ప్రథమ, ద్వితీయ స్థానాలను సాధించారు. వక్తృత్వంలో ఏడో తరగతి విద్యార్థులు నందన, రోష్ని, చిత్రలేఖనంలో ఆరో తరగతి విద్యార్థి చైతన్య, తొమ్మిదో తరగతి విద్యార్థిని అనులు ప్రథమ, ద్వితీయ స్థానాల్లో నిలిచారు. పోటీల్లో విజేతలుగా నిలిచిన విద్యార్థులకు హెచ్ఎం అప్పారావు, హిందీ ఉపాధ్యాయులు బహుమతులు అందజేసి అభినందించారు. పుస్తకాల్లో నేర్చుకున్న భాషను మాట్లాడటం, రాయడం, కళారూపాల్లో వ్యక్తీకరించడం ద్వారా విద్యార్థుల్లో భాషా నైపుణ్యాలతో పాటు ఆత్మవిశ్వాసం పెరుగుతుందని ఉపాధ్యాయులు పేర్కొన్నారు. అక్షరాల అభ్యాసం నుంచి వేదికపై అభినయం వరకు విద్యార్థులు చూపిన ప్రతిభ హిందీ దివస్ వేడుకలకు ప్రత్యేక ఆకర్షణగా నిలిచింది. కార్యక్రమంలో పాఠశాల ఉపాధ్యాయులు, విద్యార్థులు పాల్గొన్నారు… Spread the love టపా నావిగేషన్ చిన్నారుల ఆరోగ్యంపై ప్రత్యేక శ్రద్ధ.. డీ-వార్మింగ్పై మంత్రి సంధ్యారాణి అవగాహన 150 ఏళ్ల చారిత్రక ప్రస్థానాన్ని స్మరించుకున్న సాలూరు శిశు మందిర్ విద్యార్థులు
