సాలూరు, 9 న్యూస్ : జర్నలిస్టుల హక్కుల పరిరక్షణ, వృత్తిపరమైన సమస్యల పరిష్కారం, జర్నలిస్టుల సంక్షేమమే లక్ష్యంగా ఏపీవీజేఎఫ్ ముందుకు సాగుతుందని రాష్ట్ర ప్రధాన కార్యదర్శి అంజనేయులు అన్నారు. పార్వతీపురంలోని ఎన్జీవో హోంలో ఆదివారం నిర్వహించిన ఆంధ్రప్రదేశ్ వర్కింగ్ జర్నలిస్ట్ యూనియన్ ఫెడరేషన్ (ఏపీవీజేఎఫ్) మన్యం జిల్లా మహాసభల్లో నూతన జిల్లా కార్యవర్గాలను ప్రకటించారు. ఈ సందర్భంగా మన్యం జిల్లా ఎలక్ట్రానిక్ మీడియా అధ్యక్షుడిగా సాలూరుకు చెందిన సీనియర్ జర్నలిస్ట్ బంకురు శ్రీనివాసరావు ఏకగ్రీవంగా నియమితులయ్యారు. జిల్లాలోని వివిధ ప్రాంతాల నుంచి ప్రింట్, ఎలక్ట్రానిక్ మీడియా జర్నలిస్టులు, యూనియన్ ప్రతినిధులు మహాసభలకు హాజరయ్యారు. జర్నలిస్టులు ఎదుర్కొంటున్న వృత్తిపరమైన ఇబ్బందులు, సంక్షేమం, భద్రత, హక్కుల పరిరక్షణ, ప్రభుత్వం నుంచి అందాల్సిన సౌకర్యాలు తదితర అంశాలపై సమావేశంలో విస్తృతంగా చర్చించారు. జర్నలిస్టుల సమస్యలను సంఘటితంగా పరిష్కరించేందుకు ఐక్యంగా పనిచేయాల్సిన అవసరాన్ని ప్రతినిధులు వ్యక్తం చేశారు. ఈ సందర్భంగా రాష్ట్ర ప్రధాన కార్యదర్శి అంజనేయులు మాట్లాడుతూ జర్నలిస్టుల హక్కులకు భంగం కలిగించే విధానాలు, కొత్త చట్టాలు రాకుండా జర్నలిస్టుల తరఫున పోరాడుతామని తెలిపారు. వృత్తిలో ఎదురయ్యే ఇబ్బందులను సమర్థవంతంగా ఎదుర్కొంటూనే నిక్కచ్చిగా వార్తలు అందించేందుకు జర్నలిస్టులు తమ వృత్తి నైపుణ్యాన్ని మరింత పెంపొందించుకోవాలని సూచించారు. ప్రభుత్వాలు కేవలం జీవోలు జారీ చేయడంతో సరిపెట్టకుండా జర్నలిస్టులకు అవసరమైన సౌకర్యాలు కల్పించాలని కోరారు. జర్నలిస్టుల సమస్యల పరిష్కారానికి మీడియా కమిషన్ ఏర్పాటు చేయాల్సిన అవసరం ఉందని పేర్కొన్నారు. అనంతరం జిల్లా ప్రింట్ మీడియా, ఎలక్ట్రానిక్ మీడియా విభాగాల నూతన కార్యవర్గాలను ప్రకటించారు. ఎలక్ట్రానిక్ మీడియా జిల్లా అధ్యక్షుడిగా బంకురు శ్రీనివాసరావు ఏకగ్రీవంగా ఎన్నిక కావడంతో పలువురు జర్నలిస్టులు హర్షం వ్యక్తం చేశారు. సీనియర్ జర్నలిస్టుగా ఆయనకున్న అనుభవం, జిల్లాలోని జర్నలిస్టులతో ఉన్న అనుబంధం యూనియన్ను బలోపేతం చేసేందుకు దోహదపడుతుందని అభిప్రాయపడ్డారు. నూతనంగా బాధ్యతలు స్వీకరించిన బంకురు శ్రీనివాసరావు మాట్లాడుతూ తనపై నమ్మకంతో బాధ్యతలు అప్పగించిన ఏపీవీజేఎఫ్ రాష్ట్ర నాయకత్వానికి, జిల్లా ప్రతినిధులకు, జర్నలిస్టు మిత్రులకు కృతజ్ఞతలు తెలిపారు. మన్యం జిల్లాలోని అన్ని ప్రాంతాల ఎలక్ట్రానిక్ మీడియా జర్నలిస్టులను సమన్వయం చేసుకుంటూ వారి సమస్యల పరిష్కారానికి కృషి చేస్తానన్నారు. జర్నలిస్టుల హక్కుల పరిరక్షణతో పాటు సంక్షేమం, భద్రత, గుర్తింపు, ప్రభుత్వం నుంచి అందాల్సిన పథకాలు, ఇతర సౌకర్యాల సాధన కోసం యూనియన్ తరఫున నిరంతరం కృషి చేస్తానని తెలిపారు. మారుమూల ప్రాంతాల్లో పనిచేస్తున్న జర్నలిస్టుల సమస్యలను సైతం సంబంధిత అధికారుల దృష్టికి తీసుకెళ్లి పరిష్కరించేందుకు కృషి చేస్తానన్నారు. ప్రింట్, ఎలక్ట్రానిక్ మీడియా జర్నలిస్టుల మధ్య సమన్వయాన్ని పెంపొందిస్తూ మన్యం జిల్లాలో జర్నలిస్టుల ఐక్యతను మరింత బలోపేతం చేయడమే తన ప్రధాన లక్ష్యమని శ్రీనివాసరావు పేర్కొన్నారు. తనకు అప్పగించిన బాధ్యతలను సమర్థవంతంగా నిర్వహిస్తూ జర్నలిస్టుల ప్రయోజనాల కోసం నిరంతరం పనిచేస్తానన్నారు. మహాసభల్లో జిల్లా అధ్యక్షుడిగా బంకురు శ్రీనివాసరావుతో పాటు ప్రధాన కార్యదర్శిగా తాతే సునీల్ కుమార్, కోశాధికారిగా ప్రసాద్, ఉపాధ్యక్షులుగా వినోద్, శేఖర్, రామారావు, సంయుక్త కార్యదర్శులుగా కిషోర్, జె. వంశీ తదితరులను నియమించారు. నూతన కార్యవర్గ సభ్యులకు పలువురు జర్నలిస్టులు అభినందనలు తెలిపారు. Spread the love టపా నావిగేషన్ ఆంధ్రప్రదేశ్ వర్కింగ్ జర్నలిస్ట్ ఫెడరేషన్ మన్యం జిల్లా (ఎలక్ట్రానిక్ మీడియా) అధ్యక్షునిగా బంకురు శ్రీనివాసరావు
